Яр Чаллы бюджетыннан укучыларны тукландыруга 35,1 миллион сум акча бүлеп бирелгән

Сентябрь-декабрьдә мәктәпләрдә бушлай кайнар туклануга Яр Чаллы бюджетыннан 35,19 миллион сум юнәлдереләчәк. Тиешле карарны башкарма комитет җитәкчесе Фәрит Сәлахов имзалады.
Бер тапкыр кайнар бушлай туклану 1-4 сыйныф укучыларына, шул исәптән күпбалалы гаиләләрдән; өч һәм аннан да күбрәк балигъ булмаган балалары булган гаиләләрдә тәрбияләнүче 5-11 сыйныф укучыларына биреләчәк. Әлеге чара инвалид балаларга да кагылачак: 1-11 сыйныф укучылары бушлай ике тапкыр кайнар ризык алачак. Махсус медицина күрсәткечләре буенча өйдә белем алучыларга азык-төлек җыелмалары биреләчәк.