Кыяр яхшы үссен!

* Кыяр өчен нейтраль реакцияле, черемәгә бай туфрак яхшы. 
* Кыяр үрмәләп үсә башлаганчы төбен 3-5 см калынлыкта торф белән мүлчәләргә hәм даими рәвештә су сибәргә кирәк. Тагын бер таләп – төбен даими йомшарту. Туфрагы катканда, тамырларга кислород керми. Әмма бу эшне бик сак эшләргә кирәк, кыярның тамырлары өстә генә урнашкан.
* Кыярны куе утыртмагыз. Саргайган яфракларын өзеп торырга кирәк, болай аның арасына яктылык яхшырак керә. 
* Кыяр үтәли җилне, температураның кискен үзгәрешләрен яратмый. 
* Сабакта кыярны зур итеп үстермәгез. Сабактагы картайган бер кыяр калганнарының үсешен тоткарлый. 
* Кыярга суны кичтән сипмәгез. Бу аның чирләргә бирешү куркынычын арттыра. Аңа көннең беренче яртысында җылы су гына сибәргә кирәк, яфракларына тидермәскә тырышыгыз. Салкын су сибүдән кыярның тамырлары чиргә бирешә.