Чаллылылар җылылык өчен азрак түләячәкләр

Чаллыда быел 129 күпфатирлы йорт яңартыла. Капиталь ремонт кысаларында төзүчеләр 1 миллиард 392 млн сумга 306 төр эш башкарачак. Бүгенге көнгә инде алар 23 процентка үтәлгән. 

– Без яхшы темпта эшлибез. Апрель аенда электрон аукционнар үтте, өч подрядчы оешма белән килешүләр төзелде. Аларның икесе күпфатирлы йортларны ремонтлау буенча төзелеш-монтаж эшләре башкарачак, берсе – лифтларны алыштырачак. 
Быел фасад һәм түбәләрне ремонтлау буенча да күләмле эшләр башкарыла. Шулай ук инженерлык челтәрләрен, подвалларны ремонтлыйбыз. Болар барысы да йорттагы җылылыкны саклап калырга ярдәм итә, шул рәвешле шәһәрдәшләрнең җылылык өчен түләүләре дә кимиячәк, – диде шәһәр башкарма комитет җитәкчесенең беренче урынбасары Илья Зуев.