Шифаханәләргә юлны онытып тор!

ТР сәламәтлек саклау министрлыгы боерыгы нигезендә 2 февральдән республикада планлы медицина ярдәме күрсәтү туктатылды. Өлкәннәр өчен планлы медицина ярдәме, шул исәптән профилактик медицина тикшерүе һәм халыкның билгеле бер төркемнәрен диспансерлаштыру туктатылып тора. Шулай ук «Демография» илкүләм проекты буенча 65 яшьтән өлкән авыл кешеләренең сәламәтлеген  тикшерү дә алып барылмый.

Шулай ук балаларга медицина тикшерүләрен үткәрү, күчмә медицина комплексларының эше кичектерелде.

Онкология авырулары, шикәр диабеты, кан әйләнеше системасы авырулары булган пациентларга, армиягә чакырылучыларга  һәм йөкле  хатын-кызларга  әлеге  күрсәтмә  кагылмый.

Шифаханәләргә хәзер вируслы авыру симптомнары булганда  һәм прививка ясату өчен генә чакыралар.