Авиаһәлакәттә һәлак булучыларның мәетләрен якыннарына тапшыралар

Чаллының Ашыгыч медицина ярдәме хастаханәсенең патологоанатомия бүлегендә авиаһаләкәттә вафат булган кешеләрнең мәетләрен якыннарына тапшыралар. Кара катафалклар инде берничә кешенең мәетен туган якларына алып китте. 
Фаҗигадә һәлак булучыларның туганнары өчен Ашыгыч медицина ярдәме хастаханәсендә мәгълүмати-психологик үзәк булдырылган. Аларга 21 психолог ярдәм күрсәтә. Чиркәү һәм мәчет әһелләре рухи яктан терәк булырга тырыша. 
Шулай ук барлык документ эшләре дә әлеге үзәктә башкарыла. 
Мәетләрне тану аерым бинада башкарыла. Якыннарын югалткан кешеләрнең хәле бик авыр, аларны психологлар җитәкләп диярлек алып бара. 
Морг тирәсендә полиция кизү тора.