Чаллыда юл һәлакәтендә машина йөртүче хатын-кыз һәм 4 яшьлек бала зыян күргән

Чаллыда чит ил маркалы автомобильләр бәрелешү аркасында йөртүче хатын-кыз һәм 4 яшьлек бала зыян күргән. Бу хакта җирле Дәүләт автоинспекциясе хәбәр итә.

Юл-транспорт һәлакәте 5 сентябрьдә кич белән Чаллының Мәскәү һәм Халыклар дуслыгы проспектлары чатында булган. 23 яшьлек егет идарә иткән "Мицубиси Лансер" автомобиле 32 яшьлек хатын-кыз йөрткән "Мерседес" белән бәрелешкән.

Юл-транспорт һәлакәтендә машина йөртүче хатын-кызның уң як беләге сынган, салондагы 4 яшьлек малайның баш сөяге имгәнгән, баш мие селкенгән. Зыян күрүчеләрне "Ашыгыч медицина ярдәме" хастаханәсенә озатканнар.

 https://tatar-inform.tatar/news/2018/09/06/171031/