Гүзәл Миңнеханова: «Рецептларымны шундук сорап алалар»

Шәһәрдәшебез Гүзәл Миңнеханова – фудфотоблогер. Ул үзе пешергән ризыкларны зәвыклы савытларга салып, матур итеп фотога төшереп интернетка куя. Аш бүлмәсендә аңа хәзер улы да ярдәм итә икән. 

«Кыстыбый, өчпочмак, вафлиларны бер ун еллап фотога төшерәм. Институтны тәмамлап, Тукай районы хакимиятенә эшкә кергән чагым иде. «Медовик» торты, чия, алма бәлешләре пешереп алып килеп, бергә эшләгән кызларны сыйладым. Ошаттылар, рецептларын сорап алдылар. Ә миңа тәмле ризык әзерләү –  ул эш түгел, үзенчә бер ял гына. Пешергәннәремне фотога төшерә башладым. Ни әйтсәң дә камыр ризыклары, тәм-томнар үзләренә күрә бик матур, игътибарны җәлеп итә, аппетитны уята. Һәрхәлдә минем өчен шулай, чөнки мин – эстет», – дип сөйли Гүзәл.   
Кадрлар тагын да матуррак чыксын өчен ул яңа, затлы савыт-сабалар сатып ала башлый, туганнары, якыннары да бүләк итә. Аш-суга осталыгын да камилләштерә. 

«Мин үскәндә без өйдә кәкре (бәрәңге тәкәсе) генә пешерә идек. Калган камыр ризыкларын үзлектән өйрәндем. Шулай да кыстыбыйны әле дә әни белән әзерләргә тырышам. Ә менә өчпочмакны тәмле итеп кияүгә чыккач пешерә башладым. Чөнки ирем Айдар аны аеруча ярата, бигрәк тә шулпа белән. Камырын төчегә, катырак итеп басам, эчлек салганчы бераз ял иттереп алам, шулпасын пешеп чыккач тишегенә салам», – дип уртаклаша әңгәмәдәшем.  
Ул гомумән, рецептлары белән бик теләп бүлешә, чөнки фотоларын исемен әйтергә ярамаган челтәргә урнаштыру белән комментарийларда ничек әзерләгәнен сораячакларын белә.  Хәзер инде ул аларны Ватсаптагы статусына да куя. Иң мөһиме – яраткан шөгылеңә вакыт табу, чөнки яшь әнинең бар игътибары – 3 яшьлек Сөләйман белән 11 айлык Әмирәдә. Шунысы куанычлы, улы да аңа ярдәм итә башлаган.

«Ирем күбрәк итле ризыклар ярата, ә без улым белән чәй тәмнәренә гашыйк. Сөләйман хәзер үзе дә кәкре ясый белә, миңа аш бүлмәсендә ярдәм итә. Аның видеоларын күргәч, иптәш кызларым: «Хәтта мин дә аның кебек эшли белмим әле, безгә мондый кияү кирәк», – дип яздылар.  
Ризыклар фотода матур чыксын өчен Гүзәл «алмалы» смартфон куллана. Аның фикеренчә, анда төсләр дә җетерәк, экспозицияне (кадрдагы әйберләрнең урнашуы) сайлау да уңайлырак, әйберләр дә ачыграк күренә. Ә менә ризыклар көймәсен, тигез пешсен өчен ул электр духовкасын сайларга киңәш итә.