«Пушкин карта»сы белән кинога да барырга була

Яшүсмерләр хәзер музейларга, театрларга, филармонияләргә, күргәзмәләргә һәм экскурсияләргә түләүсез йөри ала. 
«Пушкин картасы» буенча йөрергә мөмкин булган кинотасмалар исемлеге Россия Мәдәният министрлыгы һәм кино фонды тарафыннан әзерләнгән. Бу – дөнья кинематографы фондына, шулай ук рус әдәбияты әсәрләрен экранлаштыруга кертелгән совет киноклассикасы һәм Россия режиссерлары фильмнары.

Театр, музей һәм киноларга барудан тыш, «Пушкин картасы» чаралары исемлегендә экскурсияләр дә бик күп. Экскурсияләргә үз шәһәреңдә генә түгел, чит шәһәрләргә дә барырга була. 

– «Пушкин картасы» белән шушы көннәрдә генә яраткан җырчым Марат Яруллин концертына бардым. Аның энергиясенә, харизмасына сокланам. Моннан тыш, сәхнәдә үзен яшьләрчә тота белүе ошый. Әле тагын кинотеатрга да барырга исәпләп торам. Бу карта булмаса, йөрер идем микән?! Белмим! Шундый мөмкинлек булгач, нигә әле кулланмаска ди?! Бик теләп йөрим, бик ошый. Икенче елга Чаллыга Ришат Төхвәтуллин килә дип ишеттем. Аның концертына да барырга планлаштырып торам, – дип сөйли Поташов исемендәге техник көллият студенты Наилә Гобәева.   

Проектта барлыгы 1500гә якын Россия мәдәният учреждениесе катнаша. 2021 елда «Пушкин картасы»н 3 мең сумга тутырып биргәннәр иде. 2022 елның 1 январеннан ул 5 мең сумга кадәр арттырылды. «Пушкин картасы»н (махсус банк картасы) алуга гаризаны дәүләт хезмәтләре порталында яки «Почта Банк»ның теләсә кайсы бүлегендә бирергә мөмкин.

«Пушкин картасы» афишасы, карта алу һәм «Пушкин картасы» аша тормышка ашырыла торган чаралар исемлеге, шулай ук билетлар алу Россия мәдәният порталында (Культура.РФ.) урнаштырылган.