Чаллыда банк картасын саткан егеткә хөкем карары чыгардылар

Чаллы шәһәр прокуратурасы 22 яшьлек җирле кешегә карата җинаять эше буенча дәүләт гаепләвен яклады. Суд аны түләү карталарын законсыз әйләнешкә кертүдә гаепле дип тапты (РФ Җинаять кодексының 187 маддәсенең 1 нче өлеше).

Тикшерү күрсәткәнчә, 2025 елның августында бу ир-ат Интернетта таныш булмаган кешенең тәкъдименә ризалашкан: 5 мең сумга үзенең дебет банк картасын һәм аңа керү мөмкинлеген саткан. Бу җинаятьне тормышка ашыру өчен, ул үзенә «Мобиль банк» хезмәтен тоташтыру өчен яңа сим-карта алган, шулай ук банк филиалына барган. Банк хезмәткәрләренә хисапны куллану максаты турында ялган мәгълүмат биреп, ул исәп ачкан һәм түләү картасын алган.

Шул ук көнне ул банк һәм сим-карталарны билгесез сатып алучыга биргән. Соңрак билгесез кешеләр бу картаны, гражданнардан урланган ярты миллион сумнан артык акчаны мошенниклык юлы белән чыгару өчен кулланганнар.

Егет үз гаебен тулысынча таныган. Дәүләт гаепләүченең позициясен исәпкә алып, суд аңа 1 ел 6 айга шартлы рәвештә ирек­тән мәхрүм итү җәзасы билгеләде, сынау срогы – 2 ел. Моннан тыш, хөкем ителүчегә 100 мең сум күләмендә штраф салынды. Суд карары нигезендә, банк картасын сатудан кергән акчага тиң сумма (5 мең сум) дәүләт файдасына конфискацияләнде.

Суд карары әле законлы көченә кермәгән.

Тагы да кызыклырак яңалыклар, фото һәм видеолар «Шәһри Чаллы»ның MAX каналында (язылыгыз).