Авыручылар атна саен арта

Шәһәрнең баш санитар табибы Илгизәр Бариев дүшәмбе киңәшмәсендә гадәттәгечә санитар-эпидемиологик вәзгыять белән таныштырды. Узган атнада барлыгы 4813 кеше кискен йогышлы авыру эләктергән. Аның 35ендә грипп ачыкланган. Баш санитар табиб: «Авыручылар саны атна саен 10%ка арта. Чирләүчеләрнең 54,6%ын балалар тәшкил итә», – диде. 
Аның сүзләрен сәламәтлек саклау идарәсе башлыгы Александр Николаев та раслады. «Сәламәтлек саклау учреждениеләренә мөрәҗәгать итүчеләр саны кимеми. Хастаханәләрдә препаратлар, шәхси саклык чаралары җитәрлек», – диде. 

Шәһәр мэры Наил Мәһдиев исә авыраган кешеләргә өйләрендә калып, дәваланырга киңәш итте. «Сәламәтлек – иң зур байлык икәнен истән чыгармыйк», – дип кисәтте ул. 
Сүз уңаеннан, йогышлы авырулар хастаханәсенең «А» блогы бу атнада тулы көченә эшли башлар дип планлаштырыла. Тиздән «Г» блогында капиталь ремонт башланачак.