«Фасадларны яңарту, түбәне алыштыру кебек эшләрне җәй көне башкарсак, сыйфат югары булачак», – дип искәртте шәһәр мэры Наил Мәһдиев.
Чаллыда торак йортларга капиталь ремонтны 2023 елның беренче сентябренә тәмамларга җыеналар. Бу хакта башкарма комитет җитәкчесенең беренче урынбасары Илья Зуев хәбәр итте.
– Сату нәтиҗәләре буенча «Твой дом» һәм «Волгопромстрой» предприятиеләре белән килешү төзелде. Быел 107 торак йортка 1 млрд 300 мең сумлык капиталь ремонт ясалачак. Барлыгы 207 төрле эш башкарылачак. Төзелеш материаллары алынды, аларны йортларга илтәбез. Капиталь ремонтны башларга һәм беренче сентябрьгә кадәр тәмамларга бернәрсә дә комачауламый, – диде ул.
«Капиталь ремонт эшләрен иртәрәк башларга дигән сүзне тормышка ашырасыз. Торак-коммуналь хуҗалык министрлыгы фонды, үзебезнең хезмәтләр тиешенчә эшләде. Фасадларны яңарту, түбәне алыштыру кебек эшләрне җәй көне башкарсак, сыйфат югары булачак», – дип искәртте шәһәр мэры Наил Мәһдиев.
Фото: © Салават Камалетдинов
Тагы да кызыклырак яңалыклар, фото һәм видеолар «Шәһри Чаллы»ның MAX каналында (язылыгыз).
Нет комментариев