Чаллыда бармагын өздергән ир-атка пластик операция ясадылар

Снегоход чылбырына эләктереп, бармагының өчтән бер өлешен өздергән ир-атка БСМПда катлаулы операция ясадылар. Табиблар алдында кулның барлык функцияләрен саклап калу гына түгел, ә  җитешсезлекләрне төзәтү бурычы да торды, ди хастаханәнең матбугат хезмәте. Мондый операцияләрне тәҗрибәле табиблар гына үткәрә. Чөнки кан йөреше туктап, некроз башланырга мөмкин. Операциягә травматолог-ортопед Гали Хуҗин алына. Ул эпонхиаль пластика үткәрә. 

"Без пациентның икенче бармагыннан тиресен алып зарарланганына күчереп тектек. Операция уңышлы үтте. Тиренең тулысынча ябышуына 3 атна вакыт кирәк булды. Соңыннан җитешсезлекләрне бетердек", - ди табиб.