Иртә карбызны ашарга ярыймы? - ФОТОЛАР, ВИДЕО

Хәния Җиһангирова 20 елга якын карбыз сата. Ул бүген Иран һәм Үзбәкстан карбызларын тәкъдим итә. 

– Иранныкылар бетүгә таба бара инде, аны апрель аеннан бирле саттык. Хәзер күпчелек Үзбәкстан карбызлары. Соңыннан Казахстан һәм үзебезнең Әстерхан, Волгоград якларыннан кайтарачакбыз. Көненә 10-15 карбыз сатыла. Бик тәмле, баллы, алып карагыз, – ди ул. 

Хәния апа карбызны сайлап алырга да булышты:

– Карбызны алганда, иң беренче чиратта, аның койрыгына игътибар итәргә кирәк, ул коры, кипкән булырга тиеш. Аннан соң шакылдатып карарга кирәк, тавышы яңгырап чыккан карбыз әйбәт була.

Хәния апа, әлбәттә, карбызларын мактый. Ә мин аны белгечләргә күрсәтергә булдым. Нитратлар ни дәрәҗәдә?

Ветеринар-табиб Лидия Ибодова башта карбызны яхшылап кер сабыны белән юды, аннан соң корытып, бер кисәген кисеп алды да угычтан кырды. Шулай итеп ул карбыздан сок ясады. Махсус прибор белән нитратларның күләмен тикшерде. Мин алган карбызда аларның күләме 34 миллиграмм күрсәтте. 

– Норма буенча нитрат күләме  бер килограмм карбызга 60 миллиграммнан артмаска тиеш, – ди лаборатория белгече.
Базарга килгән карбызлар атнага бер тапкыр тикшерелә. 

– Әлегә карбызларга артык ихтыяҗ юк. Карбыз сезоны башлангач, без аларны көн саен тикшерәчәкбез, – ди Лидия Хәмитовна.

 Хәзерге вакытта Үзбәкстан карбызының бәясе 65 сум, Ираннан кайтартылганы – 100 сум.