Яшь шәһәрдәшләребезгә мэрия буенча экскурсия уздырдылар

Башкарма комитет эшчәнлеге, структурасы белән балаларны мәгълүмати сәясәт идарәсе җитәкчесе Римма Мөхәммәтҗанова таныштырды. Ул бина буйлап экскурсия үткәрде һәм муниципаль хезмәтнең үзенчәлекләре турында сөйләде. Экскурсия беренче каттан башланды, монда кунакларның игътибарын Җәмиг мәчете проекты җәлеп итте.
Кечкенә кунаклар шәһәр тарихы архивлары саклана торган китаплар саклау урынында булдылар. 
Архив бүлеге башлыгы Люция Шәмсегалиева мәктәп укучыларына шәһәр архивларында нинди документлар саклануы турында сөйләде. 
Балалар шулай ук ордер комиссиясе эшчәнлеге белән таныштылар, нинди очракларда төзелеш эшләренә ордер алырга кирәклеген белделәр. 
Мәгариф идарәсенең һөнәри белем бирүне үстерү секторы мөдире Лилия Миннеханова үз эше турында сөйләде һәм балаларга аттестатлар һәм укудагы аерым уңышлары өчен медаль үрнәкләрен күрсәтте. 
Лагерьда катнашучылар шулай ук 405нче залда булдылар, анда шәһәр Советы утырышлары һәм башка мөһим шәһәр киңәшмәләре уза. Эшкуарлыкка ярдәм итү һәм үстерү бүлеге башлыгы Айрат Сәгъдиев икътисад идарәсе эше турында сөйләде һәм сорауларга җаваплар бирде. 
Экскурсия азагында яшь шәһәрдәшләребез, мэр кәнәфиендә утырып, индивидуаль фотографияләр ясады.
 

Фото: http://nabchelny.ru