Җеназа намазы нәрсә ул?

Халык арасында «җеназа» сүзен ишетү белән һәркемнең күңеленә сагыш һәм үлем искә төшә. Ләкин мөселман кешесе өчен бу — фани дөньядан бакыйлыкка күчү ноктасы һәм дин кардәшләребез алдындагы иң мөһим соңгы бурычларның берсе.

Җеназа намазы нәрсә ул?

Җеназа намазы — ул вафат булган мөселманның гөнаһларын гафу итүне сорап, Аллаһка кылына торган бердәм соңгы дога. Динебездә бу гамәл фарыз кифая булып тора. Ягъни, мөселманнардан бер төркем кеше бу намазны укыса, калганнардан гөнаһы төшә. Әгәр беркем дә укымаса — бөтен өммәт гөнаһлы була.

Җеназа намазының башка намазлардан аермасы нинди?

Бу намазның үзенең махсус кагыйдәләре бар:

 Рөкугъ һәм сәҗдә юк: Җеназа намазы башыннан ахырына кадәр тик басып кына укыла.

Тәһрәт кирәк: Намазда катнашучыларның һәрберсе тәһрәтле булырга тиеш.

 Намаз 4 тәкбирдән тора. Һәр тәкбирдән соң билгеле бер догалар (Аллаһка хәмде-сәнә, Пәйгамбәребезгә с.г.в. салават һәм мәет өчен махсус ярлыкау догасы) укыла.

Йоланың онытырга ярамый торган әдәпләре:

1. Тынычлыкны саклау. Җеназа үткән урында дөнья сүзләрен сөйләшү, кычкырып елау яки тавыш кубу дөрес түгел. Бу вакыт — һәркем үзенең дә бер көн шунда булачагын уйлап, гыйбрәт ала торган мизгел.

2. Ихласлык. Имам артына баскач, мәетнең гөнаһларын гафу итүне Аллаһтан чын йөрәктән сорарга кирәк. Бәлки, нәкъ менә сезнең ихлас догагыз сәбәпле мәетнең кабере нурланыр.

3. Җеназада катнашуның савабы. Пәйгамбәребез (с.г.в.) әйткән: «Кем дә кем җеназа намазында катнашса, аңа бер кыйрат савап булыр ( ә бер кыйрат — Ухуд тавы кадәр)» (Бухари).