Чаллыда кайчан кар явачак?

Татарстанда инде өченче ел рәттән ноябрь аенда аномаль җылы һава торышы күзәтелә. Көндез температура +7гә җитә. Төнлә дә артык суык түгел. Алдагы көннәрдә дә шундый ук һава торышы булачак дип фаразлый синоптиклар. Бары тик кыска вакытлы яңгырлар гына көтелә. Кар турында сүз дә юк. Ноябрь урталарында бөтен җир ап-ак була иде. Быел кар декабрьдән дә иртәрәк яумас, ди белгечләр. Мондый аномаль күренешне алар Атлантикадан җылы һаваның килүе белән аңлата. Аннан соң атмосфера басымы да гел үзгәреп тора - бер күтәрелә, бер төшә.