Сак булыгыз: бозлавык!

Шәһәрдә көчле бозлавык аркасында егылып имгәнүчеләр саны артты. "Атнаның беренче көнендә үк 118 кеше кабул иттек, 10 мартта төшкә хәтле янә 53 кешегә медицина ярдәме күрсәттек", - ди БСМПның травпункт мөдире Марсель Хәкимов.

Нигездә, унсигездән алып илле яшькә кадәрге ирләр һәм хатын-кызлар укырга яки эшкә барганда егылып имгәнә. Бозлавык вакытында табиблар түбәндәге киңәшләрне тотарга өнди:

- Дөрес аяк киеме сайлау мөһим. Мастерскойларда аның табан астын таймаслык итеп ясатырга да була. Ә өй шартларында исә аяк киеменең астына наждак кәгазе яки лейкопластырь ябыштыру да файдага булыр. Аяк киеменең биек үкчәлеләрен кимәскә тырышыгыз.

- Тайгак юлдан барганда бөтен табаныгызга басып, аягыгызны тездән йомшартып, җиргә карап атлагыз. Егыла башласагыз, чүгәләп калыгыз.

- Тигез урында егыласыз икән, башыгызны җилкәгә таба тартыгыз, терсәкләрегезне ян якка таба кысыгыз, аркагызны турайтыгыз, аягыгызны җиңелчә генә бөгегез. Иң кулае - ян якка (кулыгызны алга сузган хәлдә түгел) егылыгыз.

- Егылган очракта иягегезне күкрәгегезгә таба кысыгыз һәм кулларыгызны җәегез.