Юл читендә калдырмагыз!

10 декабрьдә Чаллының юл хәрәкәте иминлеге инспекторлары проспектлардан 22 машинаны эвакуатор белән алып киткәннәр.

"Ел башыннан калабызда машина кую кагыйдәләрен бозучыларга карата 4 меңнән артык административ материал әзерләнгән. Тиешсез урынга куелган 940 транспорт чарасы штрафстоянкага озатылды", - ди юл хәрәкәте иминлеге инспекциясе башлыгы урынбасары Айдар Мәгыйзов.

Бу атнаның 4 көнендә юлларны кардан чистарту барышында инспекторлар 52 автомобильне эвакуатор белән озатканнар.

- Безнең бурыч - юл-транспорт комплексын тиешле дәрәҗәдә тотуны тәэмин итү. Кар җыю техникасы күп очракта проспектларда калдырылган техниканы әйләнеп узарга мәҗбүр. Нәтиҗәдә, алар янында кар көртләре барлыкка килә, бу урында юл 2,5-3 метрга тарая. Ә бу хәрәкәт иминлегенә тискәре йогынты ясый. Шуңа күрә шәһәрдәшләр машиналарын проспектларда, гомумән, тиешсез урында калдырмасыннар иде. Кар чистартырга комачаулаган машина хуҗасына кесәсеннән акча чыгарырга туры киләчәк. Автомобильне эвакуацияләү - 2006 сум, транспортның бер сәгать штрафстоянкада торуы - 61 сум, болар өстенә, тагын 1000-2000 сум штраф. Машинагыз тиешле урында торса, мондый күңелсезлекләргә юлыкмассыз, урамнар да чиста булыр, - ди инспекторлар.