«Хатын-кыз бәхете» гөле: сынамышлар

Ышанулар буенча, имеш өйдә спатифиллум булса, теләсә кайсы яшьтәге хатын-кызның шәхси тормышы зарланырлык булмый. Кияүгә чыкмаган кызларга үсемлек чын мәхәббәт табарга, гаиләләренә — бәхетне озак елларга саклап калырга ярдәм итә, дип санала. Чәчәк ялгызлыктан коткара, намуссыз кешеләргә каршы тора һәм көндәшләрне якын җибәрми.  Әмма моның өчен «хатын-кыз бәхете» гөлен ир-ат бүләк итәргә тиеш. 

«Хатын-кыз бәхете», «мәхәббәт төсе» яки «ак җилкән» дип аталучы спатифиллум гадәти бүлмә шартларында үсә.  Гөл җылылык, яктылык ярата. Шулай ук аны кинәт зур чүлмәккә күчерергә ярамый. Тамырлары чүлмәкне тутырмыйча, ул чәчәк атарга ашыкмаячак. Кайбер хуҗабикәләр спатифиллумны көйсез, ди. Суны аз яки күбрәк сипсәң, туры кояш нурлары астында тотсаң, яфраклар аска салынып төшә. Гөлне сирәк кенә булса да ашламалар белән тукландырып торырга кирәк.