Кемгәдер бурычың булып, ул кеше үлеп китсә, дин буенча әҗәтеңне ни рәвешле кайтарырга?

– Бурыч ул үлгән кешенең малы булып санала. Белгәнебезчә, мал варсиларга күчә. Ягъни мәрхүмнең тормыш иптәшенә һәм балаларына. Шул рәвешле бурычны да аларга тапшырырга кирәк була. Гаиләсе юк икән, якын туганнарына бирергә мөмкин.  Мәрхүмнең үзенең дә  кемгәдер бурычы булырга мөмкин бит әле. Исегезгә алсагыз, җеназа укып бетергәч, имам яхшы кеше идеме, дигәннән соң: «Бу кешенең бурычлары юкмы?» – дип сорый. Бурычка биргән кеше шунда әйтергә тиеш. Юкса бу дөньядан бурычлы килеш китү, мәрхүмгә кабердә караңгылык, бер газап булачак. Аның әҗәтләрен туганнары күтәрергә тиеш.