Ни өчен сәдаканы күбрәк җомга көнне бирәләр?

Дин әһелләре белдерүенчә, сәдаканы атнаның теләсә кайсы көнендә бирергә була. Ләкин күп очракта безнең җирлектә яшәүче халык аны җомга бирергә ярата. Чөнки бу атнаның иң хәерле көне. Шуңа күрә бу сәдакага әҗер-савап та күбрәк языла.

Мөхәммәд пәйгамбәр: «Җомга көнендә сәдака бирү башка көннәрдә бирүгә караганда яхшырак», – дип әйтте. Бу хәдис Габдурраззак исемле галимнең «әл-Мусаннәф» хәдисләр җыентыгында искә алына. Сәдака биргән саен гөнаһлар гафу ителә һәм байлыкка хәер-бәрәкәт иңә.