Әфган җилләре

Горур, түшләренә медальләр таккан һәм чал чәчле абыйларны күргәч, менә болар чын батырлар, Ватаныбыз сагындагы асыл ирләр, дип уйлап куйдым. 
Без аларны сокланып, горурланып тыңладык. Егетләр – 1979-1989 елларда Әфган сугышында катнашкан кызалаклар. Мөслимнән Госманов Данил, Иске Карамалыдан Тимеркәев Гөлүс һәм Гәрәев Илдар, авылдашыбыз Исмәгыйлев Гаяз абыйлар ул. Исмәгыйлевлар – бөтен Советлар Союзында өч улы да Әфган сугышында катнашкан бердәнбер гаилә.
Гаяз абый сугышта танкист булган. «Иң үзәккә үткән нәрсә сусызлык иде... Иң тәмле нәрсә – су. Мин аны хәзер дә бик тәмләп эчәм. Сез дә бик сак карагыз суга!» – дип кисәтте ул безне. 
– Солдат сугышны сайламый һәм аны игълан итми. Ул Ватан алдындагы бурычын үти. Аның каһарманлыгы, Ватанга ихтирамы нәкъ менә шунда күренә, – дип сүзен башлады Илдар абый Гәрәев. Аны бу челлә илгә Германиядә хезмәт иткән җиреннән күчергәннәр икән. 
– Күңелдәге яралар, яу кырында ятып калган иптәш-ләр турындагы истәлекләр бүген дә тынгы бирми, – ди ветеран. 
Данил абый Госманов бу сугышның күпме хәсрәт китерүе турында сөйләде. 15 меңләп ир-егет яуда башын салган, 300 мең солдат яраланган, дистәләрчә меңе гарипләнеп калган. 
Данил абый бездән: «Әфган сугышы ветераннарыннан тагын кемнәрне беләсез?» – дип сорады. Белмәгәч, безнең йөзләр кызарды. Югыйсә, мәктәп стендында аларның исемнәре, фотолары тора. 
– Бүгенге егетләр армиягә барырга тиешме? – дигән сорауга дүрт Әфган ветераны да беравыздан: «Әлбәттә, ир-егетнең бурычы бит ул!» – дип җавап кайтарды. 
Иң кирәге – тынычлык. Ил-көндә аяз күк йөзе булуын телим.
Лилияна Мөбәрәкова, 
Мөслим районы, Әмәкәй мәктәбе, 7нче сыйныф.