1 сентябрьда инспекторлар җәяүле юлларында кизү торачак

21 августтан 31 сентябрьга кадәр шәһәрдә "Игътибар - балалар!" акциясе узачак. Инспекторлар җәяүле юллары янында кизү торачак. Аеруча бәйрәм көнне - 1 сентябрьда саклык чаралары арттырылачак. 

"Тиздән яңа уку елы башлана. Балалар авыллардан, ял итү урыннарыннан шәһәргә кайта башлады. Күбесе юл кагыйдәләрен онытырга да өлгергәндер. Сак булырга кирәк!" - ди Чаллының баш автоинспекторы Радий Кадиков.

Уку башлангач инспекторлар мәктәпләрдә профилактик әңгәмәләр уздырачак. Укучыларга һәм ата-аналарга юл кагыйдәләре буенча лекцияләр үткәрәчәк. 

Исегезгә төшерәбез, җәйге каникуллар вакытында да инспекторлар лагерьларда ял итүче балалар белән эшләде. Барлыгы 51 лекция оештырдылар, 40тан артык чаралар уздырдылар. 

Тагы да кызыклырак яңалыклар, фото һәм видеолар «Шәһри Чаллы»ның MAX каналында (язылыгыз).