Автоградбанк кертемчеләренә акча түли башладылар

Кертемнәрне иминиятләштерү агентлыгына Автоградбанктагы акчаларын кайтаруны сорап 295 гариза кергән. Аның 206сы физик зат, 89ы юридик зат. Аларга 140 млн сумнан артык акча кайтарылган инде. 

9 бакчачылык ширкәте, бер хәйрия фондына да акча күчерелгән. 

Исегезгә төшерәбез, иминиятләштерелгән сумманы 20 июньнән башлап кайтарып була. Моның өчен АСВ һәм «Дәүләт хезмәтләре» дәүләт порталы аша гариза җибәрергә кирәк. 

Акча гаризада күрсәтелгән реквизитлар буенча счетка яисә  Мир» карталарына күчә. 

Акчаны Россельхозбанк һәм АК БАРС БАНК кайтара. Әлеге финанс учреждениеләренең адреслары 2024 елның 24 июненнән дә соңга калмыйча АСВ сайтында урнаштырылачак.