Чаллы йортында бомба бар дип хәбәр итүченең исеме билгеле

Чаллы судында Шәйдуллин Т.З. эше каралды. Ул "112" коткару хезмәтенә шалтыратып, йортта бомба куелуы турында ялган мәгълүмат җиткерә. Исерек була. Ел дәвамында шулай өч тапкыр шаярта. Урынга, әлбәттә, хокук сакчылары, коткаручылар һәм табиблар килеп җитә. Тикшерәләр. Йортта яшәүчеләрне куркуга салырга мәҗбүр булалар. 

Ялган мәгълүмат җиткергәне һәм хезмәт кешеләрен ялган рәвештә эшләреннән бүлдергәне өчен суд Шәйдуллинны 1 елга ирегеннән мәхрүм итте. Моннан тыш, ул Чаллының Эчке эшләр идарәсенә 16 мең сум, Гадәттән тыш хәлләр министрлыгының шәһәрдәге 15нче отрядына 5 мең сум ярым штраф түләргә тиеш булачак. 

"Уеннан уймак чыга" дип юкка гына әйтмиләр...