«50 мең кешене автобусларда гына йөртеп булмый»

Чаллы мэры Наил Мәһдиев шәһәр советы сессиясе утырышына җәмәгать транспорты үсеше буенча чыгыш әзерләргә тәкъдим итте. Ул Мәләкәс аръягы микрорайонында яңа трамвай юллары төзүнең беренче этабы буенча проектның әзер булуын әйтте. Тик финанс чыганаклары билгеләнмәгән. Киләчәктә бу микрорайонда яшәүчеләр саны 50 меңнән артыр дип көтелә.

"Автобуслар белән генә 50 мең кешене йөртү мөмкин түгел", - диде мэр.

Ул ел ахырына Чаллыга 44 зур автобус алыначагын да әйтте. Ел башында 46 автобус кайтарылды инде. Шәһәр җитәкчеләре автобуслар санын 250-260ка җиткерергә планлаштыра. 

"Автобуслар алып кына җәмәгать транспорты мәсьәләсен тулысынча хәл итеп булмый. Техника халыкка тиешенчә хезмәт күрсәтсен өчен база булдырырга кирәк", - дип искәртте Наил Мәһдиев. 

Фото шәһәр хакимияте сайтыннан