Чаллы мэры вакытлыча ялга кайткан хәрбиләр белән очрашты

Чаллы мэры Наил Мәһдиев махсус хәрби операциядән вакытлыча ялга кайткан шәһәрдәшләр белән очрашты. "Мондый чаралар инде традициягә әверелде, 8нче тапкыр оештырыла", - ди ул. Мэр һәр солдатка игътибарлы. Бөтенесе белән дә исәнләшеп чыкты. Борчыган сорауларын да тыңлады.   

“Сезне исән-сау күрүебезгә шатбыз. Гаиләләрегезгә ярдәм итү буенча сүзебездә торабыз. Балалар бакчаларына сабыйларыгыз бушлай йөри, мәктәпләрдә бушлай туклана. Бер бәйрәмнәрдә дә игътибарсыз калдырмыйбыз. Сез катлаулы миссияне үтисез. Без сезнең өчен бик борчылабыз. Ярты миллион халкы булган шәһәр исеменнән сезгә рәхмәтемне җиткерәм”, - диде мэр.

Хәрби операциядә Мэрс псевдонимы белән хезмәт куючы шәһәрдәш белән аралашу мөмкинлеге туды. Ул: “Вакытлыча ялда булдым, иртәгә юлга кузгалабыз”, - ди.

Һәрбер солдатка шәһәр мэры резина аяк киеме һәм кирәк-яраклар белән капчыгы тапшырды.