Чаллыда 15 кешедә кызамык ачыклаганнар

Чаллының йогышлы авырулар хастаханәсендә дәваланучы 15 шәһәрдәштә кызамык (корь) симптомнары: югары температура, тимгелләр, ютәл, томау төшкән. Һәркайсына тиешле медицина ярдәме күрсәтелә. 

"Кызамык - 100% йогышлы авыру. Гадәттә әлеге инфекцияне прививка ясатмаган кеше авыру кешедән йоктыра", - ди Чаллының йогышлы авырулар хастаханәсенең медицина бүлеге буенча баш табиб урынбасары, шәһәрнең баш инфекционисты Татьяна Әгъләмова.

Кызамык шул ягы белән куркыныч: ул чирнең икенче атнасында пневмония ясый. Тиешле чаралар күрелмәсә, баш мие ялкынсынуына, ягъни энцефалитка китерә.

"Әлеге инфекциядән саклануның бердәнбер чарасы - вакцинация", - ди Татьяна Әгъләмова. 

Кызамык узган ел җәй һәм көз көннәрендә үзен сиздерде. Хастаханәгә мөрәҗәгать итүчеләр күп булды, ди табиб. Ел башында да шул ук хәл. Кызамык 34 кешедә ачыкланды. Аларның күбесе - прививка ясатмаган балалар. 

Искәртергә кирәк, кызамык диагнозын лабораториядә тикшерү үткәргәч кенә куялар. Соңыннан ул Түбән Новгородта раслана.