Чаллыда авариядә зыян күргән фельдшерның хәле ничек?

Чаллыда ашыгыч ярдәм машинасы һәм Ауди автомобиле катнашындагы авариядә аеруча фельдшерның берсе - 38 яшьлек ир-ат - зыян күргән иде. Машиналар бәрелгәч, табиб тәрәзәдән чыгып очып, ашыгыч ярдәм машинасы астында калды. Аның бот сөяге, кабыргалары сынды. Хәтта берсе үпкәсенә кадалды. Башына зыян килде. Чаллы табиблары 2 көн гомерен саклап калу өчен көрәште. Операция ясадылар. Хәзерге вакытта фельдшер Казанда реанимациядә. 

-    Хәле әлегә уртача авырлыкта. Тәненнән дренажларны алдылар. Табиблар әйтүенчә, уңай динамика күзәтелә, - дип сөйләде РКБның матбугат белән эшләү бүлеге белгече Валерия Белова. 

Авариядә тагын фельдшер хатын-кыз да зыян күргән иде. Аның җилкә сөяге сынды. Ул Чаллының травматология бүлегендә дәваланды. Хәзер өенә чыгарылган.