Чаллыда азартлы уен салоннары оештыручыны тоттылар

Чаллыда “җиңел” генә бизнес корырга теләүче ир-ат эзенә чыктылар. Ул май аенда, бинаны арендага алып, азартлы уен салоны оештыра. Ярдәмгә администратор яллый. Салонга телефоннан шалтыратып кына килә торган булалар. Тик бизнес озакка бармый. Хокук сакчылары егетләр эзенә тиз чыга.

Шуңа да карамастан, мондый бизнестан Чаллы егете баш тартмый. Бер ай да үтми, шундый ук уен салонын ул Шамил Усманов урамындагы бинада ача. Администратор итеп бу юлы хатын-кызны билгели. Полиция хезмәткәрләре барыбер салонны эзләп таба. 

Уен салоннары оештыручыга һәм администраторларга карата җинаять эше кузгатылды, дип белдерде ТР буенча тикшерү комитеты җитәкчесенең өлкән ярдәмчесе Андрей Шептицкий. Аларның эше судта каралачак.