Чаллыда фатир бәяләре Казан белән чагыштырганда күпкә арткан

Чаллыда фатирларның бер квадрат метры 150 мең сум тирәсе. «МИР КВАРТИР» федераль портал белгечләре яңа йортларда 32 кв.м кадәр булган фатир бәяләрен өйрәнгән. Моның өчен алар Россиянең 70 шәһәрендә тикшерү үткәргән. Бәяләр барлык шәһәрләрдә диярлек арткан. Махачкала, Белгород һәм тагын берничә шәһәрдә генә хаклар үзгәрмәгән, бераз кимегән дә. 

Бәяләр аеруча 2024 ел башында, ташламалы ипотека программасы гамәлдә булганда күтәрелгән. Тикшерү нәтиҗәләре буенча, Чаллыда 32 кв.м. зур булмаган фатир 4 миллионнан бераз артык тора. Бер ел дәвамында бәяләр 42,3 процентка арткан. Чагыштыру өчен башкалабыз Казанда мондый кечкенә фатирлар 6 миллионнан бераз кыйммәт, әмма бәяләр 13 процентка гына арткан. 

Гүзәл Шиһапова