Чаллыда иң заманча әбине ачыкладылар

Чаллының «Эврика» мәдәният сараенда әниләр көне уңаеннан, гаиләдә әбиләрнең абруен күтәрү максатыннан, «Минем әбием» шәһәркүләм бәйгесе узды. 
Чара барышында катнашучылар үзләре белән таныштырдылар, оныклары белән бергә иҗади сәләтләрен күрсәттеләр. Әбиләребез җыр-биюгә, аш-суга осталыкларын да сынады. 

Шунысы куанычлы:  барысы да оныклары белән туган телебездә сөйләшәләр. Аларда  хезмәткә, милли моңнарга, ислам диненә мәхәббәт тәрбияләргә тырышалар. «Оныкларыбыз безнең догачыларыбыз булырга тиеш», – ди бәйгедә катнашучы Гөлсәрия Шәфыйкова. 

Конкурсантларга Шәһәр Советы депутаты Фирдүсә Әюпова җитәкчелегендәге жюри бәя бирде. Төрле номинацияләрдә җиңүчеләр ачыкланды. 
Миңнефәйрүзә Камалетдинова – «Иң тыйнак әби», Клара Хөсәенова – «Милли традицияләрне саклаучы әби», газетабызның дусты, «Рәхмәт» кибете хуҗасы Алсу Рәхмәтуллина – «Иң заманча әби», Гөлсәрия Шәфыйкова – «Иң оста куллы әби» исемнәренә лаек булып, диломнар белән бүләкләнделәр. 

Моннан тыш, Татарстанның халык артисты Булат Сәлахов әбиләргә Чаллы татар дәүләт драма театрына билетлар да бүләк итте.