Чаллыда кеше машинасын урлап, утильгә озаткан ир-атка җәза билгеләнде

Тынычлык проспектында яшәүче исерек хәлдәге ир-ат "Ока" машинасын урлый. Теләгенә ирешү өчен ул манипулятор яллый. Вакыйга узган елның ноябрендә була. Урланган автомобильне ул металл кабул итү пунктына илтә. Акчасын кирәк-яракка тотып бетерә. Салынган зыян күләме - 15 мең сум.

Әлеге ир-атка карата суд утырышы булды. Ул үз гаебен таныды. "Ока" хуҗасына автомобиль бәясен (15 мең сум) кайтарды. Моңарчы да хөкем ителү сәбәпле, аны 6 айга ирегеннән мәхрүм иттеләр. Ул төзәтү колониясендә утырачак.