Чаллыда сөйгәнен кабель белән буган ир-атны хөкем иттеләр

Мәхәббәттән нәфрәткә бер адым, диләр. Чаллыда яшәүче бер ир-атның сөйгәненә карата хисләрен нәфрәт дип тә атап булмый. Ул аны, талашып китеп, кабель белән буа. Шул ук вакытта: “Төрмәгә утырсам-утырам. Мин сине барыбер үтерәм!” - дип әйтә. Салмыш була. Әмма хатын-кыз үз гомере өчен куркып, хокук сакчыларына мөрәҗәгать итә.

Әлеге ир-ат болай да шартлы рәвештә 3 елга ирегеннән мәхрүм ителгән булган. Соңыннан аны судта тагын 8 айга ирегеннән мәхрүм иткәннәр. Хәзер тагын бер эпизод. Моңарчы чыгарылган хөкем карарларын исәпкә алып, суд яңа хөкем карары чыгарды. Аны 3 ел да 2 айга ирегеннән мәхрүм иттеләр. Ул гомумрежимлы төзәтү колониясендә утырачак.