Чаллыда татар яшьләре форумы узачак

24 һәм 25 октябрьдә «Нур» яшьләр үзәгендә татар яшьләре форумы узачак. Анда шәһәр студентлары катнашачак. Әлеге чараның максаты - татар халкының милли үзенчәлеген, мәдәниятен һәм традицияләрен саклау, яшьләрнең игътибарын татар теленә юнәлтү, аны үстерүгә җәлеп итү. 

Программа кысаларында студентлар проектлары өстендә эшләячәк, төрле мастер-классларда («Хореография»; «Театр серләре»; «Вокал»; «КВН»; «Ораторлык осталыгы»; «Милли мәдәният элементлары белән бизнес») катнашачак, татар халкының милли традицияләрен һәм  уеннарын искә төшерәчәкләр.

Яшьләр үз проектларын «Мизгел» милли-мәдәни клубы ярдәмендә ел дәвамында тормышка ашыра алачак. 

Форумның икенче көнендә, 25 октябрьдә, мастер-класслар барышында алган белемнәрне гамәлдә күрсәтәчәкләр. Җиңүчеләрне бүләкләр һәм дипломнар көтә. 

Исегезгә төшерәбез, форум башкарма комитетның яшьләр белән эшләү идарәсе тарафыннан «Мизгел» милли-мәдәни клубы һәм «Нур» яшьләр үзәге ярдәмендә оештырыла.