Чаллыда трамвай паркы яңартылачак

Быел Чаллы җитәкчеләре трамвай паркын яңарту белән шөгыльләнәчәк.  Чаллы мэры Наил Мәһдиев дүшәмбе киңәшмәсендә: «Бу эш Татарстан җитәкчеләре ярдәмендә башкарылачак», – диде.
Чаллыда «Шәһәр транспорты» предприятиесе карамагындагы 100 трамвайның 66сы 39 ел эшләгән. Норматив срок 16 ел тәшкил итә. 
Наил Мәһдиев трамвай паркын яңартуны Минскиның «Белкоммунмаш» предприятиесе белән берлектә башкарылуын әйтте.
– Чаллыда автобус паркын яңарту мәсьәләсе тулысынча хәл ителде. Хәзер трамвайларны яңартасы бар. Трамвайлар бик иске. «Шәһәр транспорты» предпритяиесе балансындагы 66 трамвай 39 ел элек маршрутларга чыккан. Алар ГОСТ буенча 16 ел гына кулланылышта булырга тиеш. Шуңа күрә ТР Рәисе Казан, Чаллы, Түбән Кама шәһәрләрендә трамвай паркын яңарту турында карар кабул итте, – диде ул. 
Чаллы мэры узган атнада автокала делегациясенең Минскидагы трамвайлар җитештерү заводында булуы турында сөйләде. Бер вагон бәясе 100 млн сум.