Андрей Каргинов экипажы финишка беренче килде.
«Дакар» ралли-рейдының икенче этабында йөк машиналары арасында тагын Россия, Чаллының данлыклы «КАМАЗ-Мастер» командасы спортчылары уңышка иреште. Андрей Каргинов экипажы финишка беренче килде. Юлның беренче өлешендә кичә Дмитрий Сотников экипажы алдан килгән иде.
«КАМАЗ-мастер» командасының матбугат хезмәте хәбәр иткәнчә, махсус участокның озынлыгы 338 километр тәшкил иткән. Каргинов экипажы аны 3 сәгать 52 минут 7 секунд эчендә үтте.
Икенче булып килгән Сотников экипажы аннан — 38 секундка, «КАМАЗ»ның тагын бер вәкиле — Эдуард Николаев экипажы 2 минут 14 секундка калышты.
Согуд Гарәбстанында уза торган ярышларның гомуми зачетында Сотников экипажы әйдәп бара. Аннары Эдуард Николаев, икенче этап лидеры Андрей Каргинов һәм н Антон Шибалов экипажы.
Зөлфия ГАЛИМ
Тагы да кызыклырак яңалыклар, фото һәм видеолар «Шәһри Чаллы»ның MAX каналында (язылыгыз).
Нет комментариев