Чаллы вокзалына бомба куелу турында хәбәр килгән

Чаллыда 33 яшьлек хулиган тимер юл вокзалын шартлату белән янаган. Бу хакта «Татар-информ» агентлыгына Идел буе транспорт прокуратурасы матбугат хезмәтеннән хәбәр иттеләр.
Чаллы тимер юл вокзалында бомба куелуы турындагы хәбәр 112 бердәм номерына бүген төнлә килгән. Телефоннан шалтыраткан ир-ат диспетчерга «Вокзалда - бомба, тиздән шартлаячак» дип кычкырган һәм трубканы ташлаган.
 
Вокзалдагы пассажирлар һәм хезмәткәрләрне тиз арада эвакуацияләгәннәр, бинаны әйләндереп алганнар, дип яза агентлык. Полицейскийлар вокзалның бөтен почмакларын һәм якын-тирә территорияне җентекләп тикшерсә дә, бомбаны таба алмаган.
 
Хулиганны тоткарлап, полиция бүлегенә китергәннәр. Хәзер аңа карата җинаять эше кузгату турындагы мәсьәлә хәл ителә. Әгәр ир-атның гаебе расланса, ул биш елга ирегеннән мәхрүм ителәчәк.+
 

Тагы да кызыклырак яңалыклар, фото һәм видеолар «Шәһри Чаллы»ның MAX каналында (язылыгыз).