Чаллыда башкарма комитет җитәкчесе вазифасына конкурс игълан ителде

Чаллыда 23 мартка башкарма комитет җитәкчесе вазифасына конкурс билгеләнде. Мондый карарны шәһәр Советының XIII утырышында депутатлар кабул итте.

Хәзер автошәһәрнең башкарма комитетын Фәрит Сәлахов җитәкли.

Регламент нигезендә, башкарма комитет җитәкчесенең килешүе биш елга төзелә. Сәлахов белән килешү биш елга түгел, ә ике елга төзелгән, чөнки башкарма комитетның элеккеге җитәкчесе Ринат Абдуллин вазифасыннан 2020 елда вакытыннан алда киткән. Бу срок нәкъ менә 2022 елның мартында бетә, шуңа күрә шәһәр советы конкурс игълан итәргә тиеш.

Конкурс комиссиясе составына депутатлар корпусыннан кандидатлар сайлау өчен Венера Туктарова, Евгений Архипов һәм Альберт Петров керде.

Комиссия составының яртысын Татарстан Президенты Рөстәм Миңнеханов билгеләде, аның катнашында утырыш узды. Алар исәбенә Дәүләт Советы депутаты Светлана Захарова, Татарстанның беренче вице-премьеры Рөстәм Нигъмәтуллин һәм Татарстан Президентының Территорияләр белән эшләү идарәсенең баш киңәшчесе Фәнис Нуриев керде.