Чаллыда исерек ир хатыны белән талашканда ике айлык кызын имгәткән

Россия Тикшерү комитетының Татарстан буенча тикшерү идарәсенең Чаллы шәһәре тикшерү бүлеге ике айлык кызын имгәткән 26 яшьлек ир-атка карата җинаять эше ачкан.

«Татар-информ»га үз чыганакларыннан билгеле булганча, ир белән хатын арасында низаг урамда ук башланган. Исерек ир-ат хатынын баласын дөрес карамауда гаепләгән. Алар өйләренә керә һәм талашуларын дәвам итә. Ир белән хатынны әти-әниләре аерырга тырышкан.

Низаг вакытында ир белән хатынның кечкенә кызлары әбисенең кулында булган. Хатын-кыз бала белән бүлмәдән чыгарга теләгән, әмма исерек әти кеше баланы тартып алган.

«Ир-ат ишек читенә бәрелгән. Бала да имгәнгән. Табиблар баланың баш түбәсе сөяге сынган һәм бите күгәргән дигән диагноз куйган. Баланы тикшереп, ярдәм күрсәткәннән соң, аны әнисенә биргәннәр», — диде агентлык чыганагы.

Ир-атка карата кече яшьтәге баланың сәламәтлегенә аңлы рәвештә зыян салу факты буенча җинаять эше ачылган.