Чаллыда «Шәһәрнең иң яхшы социаль юнәлешле коммерцияле булмаган оешмасы» конкурсында җиңүчеләр ачыкланды

Катнашучыларны Башкарма комитет җитәкчесе урынбасары Наталия Кропотова сәламләде: «Үзенчәлекле категория кешеләр белән эшләүче кешеләр дә үзенчәлекле, чөнки һәр кеше дә сез һәм сезнең коллективларыгыз башкарган эшләрне эшли алмый. Коммерцияле булмаган оешмалар бездә барлыгы 400гә якын, шуларның 30ы актив. Дүрт оешманы гына сайлап алу авыр булды, иң яхшылардан без иң яхшыларны сайладык, шуңа күрә минем бу конкурста катнашучыларның барысын да котлыйсым килә».
Конкурс эшләрен карау нәтиҗәләре буенча «Шәһәр балалары һәм яшьләре» номинациясендә «АртШкола» балалар-яшүсмерләр ял итү үзәге» җиңүче булды. Оешма «Школа рока» һәм «Знай-ка» иртә үсеш мәктәбе» кебек проектлар өстендә эш алып бара.
«АртШкола» балалар-яшүсмерләр ял үзәге җитәкчесе Ярослав Гользаузер фестивальнең географиясен һәм форматын киңәйтергә планлаштыруын билгеләп үтте: «Без Чаллыда куәтле рок-фестиваль оештырырга теләр идек, анда яшь командалар да, танылган төркемнәр дә катнашыр иде. Быел җәй без ИТ-парк түбәсендә, Түбән Камада рок-фестиваль уздырдык. Башка шәһәрләргә дә чыгарга теләр идек. Атна саен без катнашу өчен 20-30 гариза кабул итәбез, шуларның 10-12се чыгыш ясарга сайланыла», - диде ул.
«Шәһәр экологиясе» номинациясендә Яр Чаллы шәһәре Үзәк районының территориаль иҗтимагый үзидарәләрне үстерүгә ярдәм итү ассоциациясе җиңү яулады. Үзәк районының 19 кешедән торган ТИҮ командасы Бөек Ватан сугышында Җиңү истәлегенә яшелләндерү буенча социаль экологик проект оештырды.
«Тигез мөмкинлекләр шәһәре» номинациясендә мохтаҗларга ярдәм күрсәтү буенча социаль проектны тормышка ашыручы «Болгар» хәйрия фонды җиңде.
«Минем тәҗрибәмдә Россия Президенты, Татарстан Президентының туклануын оештыру иде. 20 елдан соң мин ярдәмгә мохтаҗ булган кешеләрне ашата башладым. Бу кешеләр арасында аз керемлеләр, күп балалылар, пенсионерлар бар. Бүген без авыр тормыш хәленә эләккән кешеләрне җәмгыять тормышына яраклаштыру буенча эшләрне башкарабыз», - дип билгеләп үтте «Полевая кухня» җитәкчесе Рөстәм Гатин.
«Безнең шәһәр» номинациясендә «Горизонт» Ресурс үзәге автоном коммерцияле булмаган оешма иң яхшысы дип табылды.

http://nabchelny.ru/