Чаллыда тәмәкене кәнфиткә алмаштырдылар

Хастаханәнең профилактика бүлеге мөдире Андрей Борисов шәһәр халкына әлеге начар гадәтнең зыяны, нинди куркыныч авыруларга китерергә мөмкин булуы турында сөйләде, ә шәфкать туташлары исә махсус буклетлар таратты һәм үтеп баручыларга тәмәкене кәнфитләргә алмаштырырга тәкъдим итте.

Медицина хезмәткәрләренә шәһәр халкы: «Тәмәкедән баш тарту минем сәламәтлегемә нинди файда китерә?» дигән сораулар да биргәннәр.

– Моңа җавап бирәбез, – диләр хастаханә шәфкать туташлары. – Беренчедән, хроник авырулар барлыкка килү куркынычы кимиячәк һәм сез озаграк яшисез. Сезгә суларга җиңелрәк булачак, «тәмәке тартучы ютәле» юкка чыгачак. Сездән тәмәке исе килеп тормас. Шулай ук тешләр – ак, чәчләр – ялтыравыклы, тән тиресе саф булачак. Сез спорт белән озаграк шөгыльләнә алачаксыз. Моннан тыш ризык күпкә тәмлерәк булачак. 

1 сәгать эчендә 37 Чаллы кешесе тәмәкесен кәнфиткә алмаштырган. Мондый акция дәвамлы булачак әле, дип белдерәләр медицина хезмәткәрләре.