«Голос» шоуында җиңгән Динә Гарипова әни булырга җыена

Яшел Үзәндә туып-үскән җырчы Динә Гарипова үзенең Инстаграмында матур фото куйган. Ул әни булырга әзерләнә. Фото астына «Яңа үзгәрешләр көткәндә. Барыгызны да гашыйклар көне белән» дип язган.

Динә үзенең шәхси тормышы турында сөйләргә яратмый. Әлеге шатлыклы вакыйганы тамашачылары белән уртаклашырга булган.

Ул беренче каналда "Голос" шоуында җиңеп, дөньяга танылды. Бер миллион акча алды һәм Татарстанның атказанган артисты исеменә лаек булды. Динә КФУның журналистика факультетын тәмамлаган.

 «Евровидение 2013» конкурсында катнашты, җырлар яза, фильмнарда төшә. Аның башкаруындагы «Ай, былбылым...»  татар халык җыры «Зөләйха күзләрен ача» сериалында яңгырады. Динәбез әни булу бәхетен дә кичерсен иде.

Фото җырчының аккаунтыннан алынды.