Яңа ел бүләкләре шик уятса...

Роспотребнадзор идарәсе балалар товарларының сыйфаты һәм куркынычсызлыгы, Яңа ел бүләкләрен сайлау мәсьәләләре буенча «кайнар линия» ачты.

Товарларның сыйфатына кагылышлы сораулар 19 декабрьгә кадәр кабул ителә. РФ Роспотребнадзор хезмәтенең бердәм консультация үзәгендә тәүлек әйләнәсендә 8-800-555-49-43 телефоны буенча, ТР буенча Роспотребнадзор идарәсендә 273-15-83 телефоны буенча эш көннәрендә 10:00 сәгатьтән кабул итәләр.

Чаллыда 21 ел буе балалар өчен Яңа ел бүләкләре тутыручы эшмәкәр Резидә Шәрәфгалиева ел саен 2 меңгә якын пакет әзерли, элек күпләп сату белән шөгыльләнгәндә бу сан 8 меңгә кадәр җиткән.

«Ассортимент төрле – 300 сумнан алып 2000 сумга кадәрге пакетлар бар. Кемдер шикәрсез тәм-том сорый, аларга күбрәк как, балсыз вафлилар куябыз. Хәләл пакетлар сораучылар да бар. Аларга да булдыра алганча дөрес итеп тутырып бирәбез. Һәр конфетның составы язылган, пакетларга сертификатлар да бирәбез. Балаларга тапшырыласы торган тәм-томнарны игътибар белән сайлыйбыз, куллану вакытларын тикшерәбез», – ди Резидә Шәрәфгалиева.