Йогышлы авырулар хастаханәсенең элеккеге баш табибы вафат

Йогышлы авырулар хастаханәсенең элеккеге баш табибы, Чаллының сәламәтлек саклау өлкәсе ветераны Ринат Гыйзатуллин вафат. Бу хакта элеккеге  хезмәттәшләре хәбәр итте. 

Ринат Миннебариевич медицинага дистәләрчә ел гомерен багышлады һәм Чаллының сәламәтлек саклау системасын үстерүгә зур өлеш кертте. Ул 1954 елда туа. 1978 елда Пермь дәүләт медицина институтын «дәвалау эше» белгечлеге буенча тәмамлый. Һөнәри юлын 1979 елда Чусовой шәһәре хастаханәсендә башлап, соңрак Чаллыга күчеп килә.

Шәһәрдәге карьерасын анестезиолог-реаниматолог буларак башлый, ә соңрак 1982 елда 2нче балалар хастаханәсендә ачылган беренче балалар реанимациясе бүлеген җитәкли. 1991 елдан башлап Ринат Гыйзатуллин йогышлы авырулар хастаханәдә эшли, анда реанимация һәм интенсив терапия бүлеге мөдиреннән алып баш табибка кадәр хезмәт юлын үтә.

1998 елдан дәвалау учреждениесен җитәкли. Бу чорда хастаханәдә диагностика базасы сизелерлек киңәйтелә, шәһәрдә беренче тапкыр вирусология лабораториясе ачыла һәм заманча ПЦР-диагностика ысуллары кертелә. Соңрак хастаханә Татарстанның төньяк-көнчыгышы өчен йогышлы авырулы пациентларны диагностикалау һәм дәвалау буенча районара үзәккә әверелә.

Хезмәттәшләре Ринат Гыйзатуллинны югары дәрәҗәдәге һөнәри белгеч, яшь табиблар өчен остаз һәм үз эшенә чын күңелдән бирелгән кеше буларак искә ала. 

Табиб белән хушлашу 9 июньдә сәгать 10:00 Үзәк урамдагы «Тәүбә» мәчете янында үтәчәк.