«Күңел» радиосыннан – татарча дискотека

 «Күңел» радиосы  үзенең юбилее уңаеннан шәһәр халкын берсеннән-берсе кызыклы чаралар белән шатландыруын дәвам итә. 21 июльдә «Сандали» пляжында татарча дискотека булды. Бирегә килгән кызлар-егетләр татар эстардасының популяр артистлары Илнат Фәрхуллин, Рузилә Хәйретдинова, Ришат Фазлыйәхмәтов, Дилә Нигъмәтуллинаның дәрте җырларына кушылып рәхәтләнеп биеделәр. «Әлеге чараны алып баручыбыз Лилия Гатина оештырды. Аллаһка шөкер, барысы да бик әйбәт булды. Иң мөһиме безнең тыңлаучыларыбыз, шәһәрдәшләребез канәгать калды. Аз булды, безгә җитми калды, атна саен уздырыгыз диделәр», – ди «Күңел»нең җитәкчесе Лилия Мәхмүтова.

Чыннан да дискотека яшьләргә бик ошаган. «Пандемия аркасында мондый күңел ачулар булмый торды. Татар яшьләре өчен мондый кичәләр бик кирәк. Җырлап, биеп рәхәтләнеп ял иттек. Безгә бәйрәм оештыручыларга рәхмәт яусын», – ди шәһәрдәшебез Асия Сөнгатуллина.

«Күңел» радиосы халык өчен кызыклы чаралар оештыруын дәвам итә. 30-31 июльдә коллектив радиомарафон оештыра. Бу көннәрдә төрле елларда алып баручы булып эшләгән кешеләр эфирга чыгачаклар.

Зөлфия ГАЛИМ