Украиннарга - бушлай юллама

Мариупольдән Чаллыга күчеп килергә мәҗбүр булучыларның балалары шәһәр яны лагерьларендә ял итә алачак. Шәһәр хакимияте аларны, теләкләре булган очракта, юлламалар белән тәэмин итәргә әзер. Шәһәргә исә әти-әниләре белән барлыгы 54  бала килде.  

Шәһәр мэры Наил Мәһдиев җаваплы җитәкчеләргә ата-аналар белән аңлату-таныштыру эшләре алып барырга кушты. «Аларга шәһәр яны сәламәтләндерү лагерьләрендәге шартларны күрсәтергә кирәк.  Балалар 8 ел пуля, бомбалар гөрелтесе астында яшәделәр. Бүген алар тыныч тормышта ял итәргә тиеш. Мариупольдән килгән малайлар һәм кызларга аерым ихтибар бирергә кирәк», – дип искәртте Наил Гамбәр улы.