«Мәскәү проспектын иртәрәк ясап бетерергә кирәк!»

Эшлекле дүшәмбе киңәшмәсендә Чаллы мэры Наил Мәһдиев Мәскәү проспекты дәвамы төзелешенә тукталды. Бүгенге көндә биредә эшләр 60 процентка төгәлләнгән. Проект буенча юлларны 1 сентябрьда кулланылышка тапшырырга тиешләр. Наил Мәһдиев озакка сузмаска кушты. 

“1 сентябрь соң була. Юлларны 10 көнгә иртәрәк, 20 августка ачарга кирәк. 1 сентябрьдә балалар  мәктәпләргә йөри башлый. Ыгы-зыгы булырга тиеш түгел. Аннан соң, автобуслар хәрәкәтен алдан көйләп кую зарур. Мәскәү проспекты буйлап 2нче һәм 3нче маршрутлар йөриячәк. Притяжение микрорайонына пассажирлар азмы-күпме икәнен алдан билгеләп, җитешсезлекләрне төзәтергә кирәк”, - диде ул.  

Исегезгә төшерәбез, Чаллы хакимияте 24 яңа автобус сатып алды. Аларның 14се май аенда шәһәргә кайтартылды.