Мэр гаеплеләрне җавапка тартырга кушты

Дүшәмбе киңәшмәсендә шәһәр мэры канализация коелары капкачларына бәйле булган бәхетсезлек очракларына карата үз фикерен белдерде. Узган атнада кар чистартканда техника кое капкачларын кузгаткан һәм өлкәннәрнең җавапсызлыгы аркасында, бер-бер артлы ике бала коега егылып төшкән иде. «Бу фактлар буенча контроль, тикшерү органнары нәтиҗәле эшләргә тиеш. Гаепле кешеләрне һичшиксез административ, җинаять җаваплылыгына тартырга кирәк. Мондый хәлләрдән башкалар сабак алсын. Кадрлар буенча да тиешле карарлар кабул ителсен», – диде мэр Наил Мәһдиев. Ул бу мәсьәлә буенча бүген үк нинди чаралар күрелүе хакында хәбәр итәргә кушты.