Наил Мәһдиев: “Без дә иртән зарядка ясыйбыз”

Иртәнге сәгать 7. Хәсән Туфан проспекты һәм Раскольников урамы киселешендә ыгы-зыгы. Шәһәр җитәкчеләре, депутатлар кулларына көрәк тотып эшләде.

1 апрельдән Республикада әйләнә-тирәне чистарту һәм яшелләндерү буенча икеайлык башлана. Чаллы хакимияте иртәрәк эшкә кереште. Хәсән Туфан проспекты буйлап 300 төп миләш агачы утыртылды. Исегезгә төшерәбез, 7 ел элек әлеге урында кафелар тезелеп тора иде. 

Чаллы мэры Наил Мәһдиев:
-    Бүген иртән Татарстан Рәисе Рөстәм Миңнеханов социаль челтәрендә кар барсы белән видео элгән. "Барс зарядка ясый. Сез дә ясыйсызмы?", - дип сорау биргән. Рөстәм Нургалиевич, горурлык белән без дә иртән зарядка ясыйбыз дип әйтәм. Алай гына да түгел шәһәргә файда китерәбез, - ди мэр. 

Шәһәрне чистартуга һәм яшелләндерүгә атна саен чыгачаклар.

- Яз көне барлыгы 5 меңгә якын агач утырту планлаштырыла. Ел буена 30 мең агач утыртырга уйлыйбыз. Узган ел без 27 мең 800 төп утырттык, - диде шәһәр башкарма комитеты җитәкчесенең беренче урынбасары Илья Зуев. 

15 апрель көнне гомумшәһәр өмәсе булачак.